Euskara eta orijinaltasuna: Zea Maysek gorrentzako bideoklipa egin du

Orijinala bada, oso; eta ederra ere bai. Euskaraz denez, atal honen barruan jartzeko askatasuna hartu dut. Zea Maysek, bere azken diskoko "Negua joan da eta" abestiarekin gorrentzako bideoklipa egin du, eta ikusteko modukoa da!

Egia esan ez dakit beste hizkuntzatan lehendik horrelako zerbait eginda dagoen; euskaraz behintzat ez dut uste, oso oker ez banago lehenengo aldia da (inork antzerako bideorik ezagutzen badu, abisatu!). Niri behintzat oso ona iruditu zait, sekulakoa. Pentsa liteke pertsona bat zeinuen hizkuntzan abesti bat interpretatzen ikustea aspergarria izan litekeela, baina keba! Interpreteak indar handia ematen dio bideoari, oso ondo egiten du bere lana; ez zara aspertzen, eta pixka bat ikasteko ere balio du! Ziur, bideoa ikusi ondoren ia mundu guztiak gogoratuko duela "larrua jo" nola esaten den!

Euskara eta orijinaltasuna: Korrika

Euskara ahoz aho, euskara eskuz esku; Korrikak euskalduntzearen aldeko aldarria zabaltzen du Euskal Herri osoan barrena emozioz beteriko 10 egunetan.

Lehenago aipatutako bideoak orijinalak dira, zalantzarik gabe; baina nire ustez euskararen alde egiten diren ekimenen artean txundigarriena bi urtez behin ospatzen den Korrika da. Ehundaka kilometro, milaka pertsona eta lekuko bakarra, inoiz geratzen ez den lekukoa. 17. edizioa da aurtengoa, baina urte guzti hauetan ez du emozio izpirik ere galdu. Hasiberria zen AEKk bultzada ekonomikoa lortzeko antolatu zuen lehenengo Korrika; 17 edizioren ondoren helburu hori mantentzen jarraitzen du, eta euskarak horrelako ekimenik behar ez izatea nahiko genukeen arren, emozioz itxaroten dugu errepide alboan furgonetaren musika hotsa noiz entzungo.

17.edizioko prestaketekin buru belarri dabiltza orain AEKko lagunak, baina atzera begira jartzea polita da batzuetan. Youtubek eskaintzen duen hemeroteka zabalean barrena nabigatzen, bideo pare bat topatu ditut. Lehenengoa hauxe, 1999an egindako bideo bat, Korrikaren historia eta filosofia azaltzen du.




Beste bideo hau EITBrena da, honek ere Korrikaren historia kontatzen digu. Euskararen aldeko ekimen baten bideo bat gazteleraz izatea ironikoa ote den ala ez, beste batean eztabaidatuko dugu...

Euskara eta orijinaltasuna: Kilometroak'98ko bideoa

Euskara eta orijinaltasuna aipatuta, urtero urtero egiten diren Kilometroak, Ibialdia, Araba euskaraz, Nafarroa oinez eta Herri Urratseko bideoetaz oroitu naiz. Eta, batez ere, Kilometroak'98 ko bideoklipaz.

Kilometroak, Ibilaldia, Herri Urrats, Araba euskaraz eta Nafarroa oinez Euskal Herriko ikastolek antolatzen dituzten jaialdiak dira; euskararen alde eta bestelako hezkuntza sistema bat bultzatuz. 5 jaialdi urtero, Hegoaldeko euskal probintzia bakoitzeko bat, eta Iparraldean beste bat. Urtero, beraz, 5 bideo gai beraren inguruan, eta guztiak erakargarri egin behar... geroz eta zailagoa da orijinaltasunari eustea!

Ba horretan pentsatzen ari nintzela, Kilometroak 98ko bideoaz oroitu naiz. Tolosaldean ospatu genituen urte artan Kilometroak; Anoetako Herri Ikastolan ikasten nuen nik garai hartan eta guk ere, ikasle gisa, hartu genuen parte guzti hartan! Besteak beste, bideokliparen grabaketan! Pertsonaia famatu ezberdin askok kantatzen zuten "Mundiala!" leloa zeukan ospakizun hartako abestian. Baina beno, esatea baino, ikustea hobe, ezta?




Bideo honek oroitzapen asko ekartzen dizkit, kuriositate gisa, oso ondo gogoratzen dut bideo honen grabaketa izan zela "web" hitza lehenengo aldiz entzun nuen momentua. Orain pentsaezina dirudi, baina abestiak "web, web, web, web, mundiala da!" esaten duen momentuan dantzan ari ginenetako inork ez genuen ulertzen zer zen esaten genuena. Zer demontre da ba "web" hori?!?

Ta bueno, propina gisa, sekretutxo bat esango dizuet... bideoko segundutxo batean, ni ere agertze naiz!

Euskara eta orijinaltasuna: Euskaraz bizi nahi dut!

Aurreko post-ean aipatzen nuen bideoaren zati batean lelo hau zeraman kamixeta agertzen zenez, beste kanpaina batekin gogoratu nintzen, "Euskaraz bizi nahi dut" zioen kanpainarekin, alegia.



Beste ekimen honetan du oinarria kanpaina horrek. Batzuk esango dute ez daukala zentzurik, "ze zerikusi daukate besarkadek eta euskaraz bizitzearen aldeko kanpainek?". Ba nik uste zentzu bat aurkitu ahal zaiola. Jatorrizko ekimenean "Free hugs" zioen kartelak, besarkadak debalde banatzen zituen gizon hark. Oraingo kartelak "euskaraz bizi nahi dut" jartzen du. Esaidazue, Nafarroan euskaraz bizi nahi duena ez al da apur bat bakarrik sentituko? Ez ote du besarkada baten beharrik, jasaten dituen eraso guztiak eta gero? Bai, besarkadak eskatu gabe eman behar zaizkio horri...

Eta jatorrizko bideoarekin dituen paralelismoekin jarraituz, hau ere ez da bideo huts batean geratu, bideo gehiago etorri ziren honen atzetik. "Free hugs" jende askok imitatu zuen mugimendua izan zen, eta "Euskaraz bizi nahi dut" kanpainak herriz herri estilo bereko bideoak bildu ditu: Berriozarren,  Arrotxapean, Lizarran...

Ideia beste ekimen batzuetatik hartutakoa bada ere, nik uste orijinala izaten jarraitzen duela, ez dela beti egiten den zerbait eta herriz herri grabatutako bideo horiek gertutasuna ematen diotela kanpainari.

Euskara eta orijinaltasuna: AEKren eskerrak emateko bideoak

Hainbat pertsona erdi biluzik agertzen ziren bideo ezberdinak publikatu ditu AEKk azken egunetan. Euskara ikastera jendea erakartzeko modu berria ote zen galdetzen genion batzuk geure buruari...

Bideo kuriosoak, probokatzaileak, atentzioa deitzen duten horietakoak... AEKko hauek badute nahikoa imajinazio! Baina hori ere normala da, hainbeste urtetan jendea euskara irakastera animatzen aritzeak ideiak etengabe berritzera behartzen zaitu! Baina aipatzen ditudan bideo hauek ez dira matrikulaziorako bideoak, orain egun gutxi kaleratu zuten azken bideoa, gainontzeko guztiei zentzua ematen ziena. Hauxe da:

Eskerrak emateko bideo bat da beraz, eskerrak eman eta aldi berean salaketa modu orijinal batean egiteko modu bat. Nafarroako Gobernuaren hizkuntza politikaren ondorioz euskaltegien dirulaguntzak “oso desegokiak” direla salatzen dute, eta egoera larri honetan Gobernuaren erabateko aldaketa ezibestekoa dela ere esaten dute; baina hori horrela idatzi izan balute ez zuten jendearen atentzioa deitzea lortuko... bideo hauekin bai.

Komunikazio estrategia ezberdinak, orijinalak... mota guztietako informazioz inguratuta bizi gara eta geroz eta zailagoa da itsaso horren erdian gure irlatxoa ezagun egitea. Zorionak AEKri, lehenik eta behin horretaz konturatu izanagatik; bigarren, horren aurrean neurriak hartu izanagatik eta, azkenik, egiten duten lan guztiagatik.

Bestelako Komunikazioa: ...eta ura berde jarri zen!

Bestelako komunikazioa: estrategia informatibo berriak irakasgaian ariketa praktiko bat egin dugu. Ekimen konkretu bat aukeratu; ezberdina, orijinala, berria izan den ekimen bat. Horren azterketa egin eta medioetan izan duen oihartzunaz jabetu.

Nik aukeratu dudana Independentistak Sarekoek Madrilgo Zibelesen eta Parisko Louvre museoan egin zutena izan da. Zaila izaten da bortizkeria zuzenik gabeko Euskal Herriko ekintza batek medio estataletan lekua izatea, eta honekin lortu zen (Espainiako kasuan bederen, Frantziakoan ez dut gehiegi topatu, nere frantses eskasari esker...).

Hona hemen beraz, ura berde jarri zen hartako kontakizuna:

Ahozkotasuna eta multimedia diskurtsoa, 2.zeregina.

Ikusentzunezko erreportai bat egiterakoan gauza asko hartu behar dira kontutan. Erreportai hori hedabide digital baterako egina denean, pentsatu beharreko gakoak biderkatu egiten dira. Horixe dakar multimediatasunak, komunikazio aukerak zabaltzen ditu, baina aukera horiek ondo aprobetxatzen jakin egin behar da!

Horretarako, erreportaia osatzeko hainbat pausu jarraitu behar dira, eta pausu bakoitzean multimediatasuna ondo garatzeko beharrezko diren hainbat erabaki hartu beharko ditugu. Nire ustez pausu horien artean bereziki garrantzitsua da azken biak aipatzea; produktu definitiboa osatu eta berau hedabide digitalean kokatzearekin batera, sarean zabaltzea. Bi puntu hauetan aro berriko multimediatasunak eskaintzen dituen aukera berri horiek sartzen dira jokoan bete betean. Erreportaia osatzerakoan kontutan hartu beharko dugu hipertestuaren erabilera, interaktibitatea eta multimediatasuna. Euskarri ezberdinak eskura izanik eta guztiak erabiltzeko ahalmen berarekin, horietatik zein lehenetsi erabakitzea guri dagokigu, eta horretarako hartzailearen perfilean jarri beharko dugu arreta. Eta azkenik, produktuaren zabalpena. Hedabide digitalean bertan agertzeaz gain, sarean zehar ahalik eta gehien zabaldu behar dugu gure lana, horretarako ere hartzailearen perfila ondo ezagutzea garrantsitsua da; sare sozialetan ibiltzen ote den, zein webgune bixitatzen dituen...

Multimediatasunarekin, beraz, erreportai bat egiteko urratsak ez dira produktuaren osaketarekin amaitzen, haren zabalpena ere planifikatu beharrezko zerbait da. Gero eta hobeto planifikatu, orduan eta jende gehiagorengana iritsi ahalko gara.